|
Duke u munduar të jenë sa më orgjinale, mediat
kosovare kishin pasur secila qasjen e tyre të veçantë,
duke përdorur tituj, fotografi, hyrje tekstesh e imazhe të
ndryshme televizive prej njëra tjetrës. Përpjekja
për t’u dalluar kishte shkuar aq larg sa mediat kishin
dhënë raporte kontradiktore lidhur me takimet e Klintonit
me politikanët kosovarë
Kënd ka takuar Klinton prej politikanëve kosovarë
gjatë vizitës së tij? Kjo pyetje ndonëse ka
qenë me mjaft interes për opinion publik kosovar, ka mbetur
jo vetëm e pasqaruar nga mediat, por duket se ato kanë
kontribuar më shumë në mjegullimin e përgjegjes,
duke u përpjekur „t’a takojnë“ ish presidentin
amerikan me gjithë spektrin politik kosovar.
E vërteta ndërkaq duket të ketë qenë ndryshe.
Sipas Hajredin Kuçit, organizatorit kryesor të vizitës
së Klintonit, ish-presidenti amerikan është takuar
në një takim të veçantë vetëm me
kryetarin e Kosovës, Ibrahim Rugova, në dhomën të
cilën e ka ofruar Universiteti. Sipas Kuçit, ky takim
ka zgjatur më shumë se 30 minuta. Të gjitha ato që
u quajtën takime, shkëmbim mendimesh, shtrëngim duarsh,
etj, me politikanët tjerë, kanë ndodhur në hollin
e sallës së Fakultetit Filologjik, duke qëndruar
në këmbë, në koktejin e organizuar para ceremonisë
së shpalljes doktor. Ajo që nuk u tha ishte: me kënd
nuk u takua Klinton dhe kush nuk ishte në ceremoninë në
F.Filologjik. E aty nuk ishin: Agim Çeku dhe Harri Holkeri.
Gazeta Zëri kishte cituar zëdhënësen e UNMIK-ut
Karlovic, duke thënë se takimi i Klintonit me kryeadministratorin
Holkeri kishte qenë një takim privat.
Duke u përgjegjur për Javën, Karlovic ka përsëritur
se ky takim ka qenë privat, sepse „kjo nuk ishte vizitë
zyrtare“.
„Ata njohin njëri tjetrin dhe ky ka qenë takim privat“,
ka thënë Karlovic.
Arsyeja pse Holkeri nuk ka qenë prezent në sallën
e fakultetit, sipas Karlovic, ka qenë fakti se Holkeri ka pasur
takime dhe obligime tjera gjatë ditës.
„Ai kishte takuar Klintonin më herët, ndërsa
më vonë kishte obligime tjera“ ka thënë
Karlovic.
Sipas Zërit, Holkeri ka takuar në ditën e vizitës
së Klintonit gjeneralin Çeku, ndërsa sipas një
burimi, takimi i mbajtur në ora 11, me gjithë kërkesën
e Çekut, nuk është shtyrë për më
vonë.
Kjo ka qenë arsyeja, sipas burimit, e mosprezencës së
Çekut në festën e përgatitur në Universitet,
ku Klinton ishte shpallur doktor nderi.
„Nuk mund të rikujtoj në këtë moment me
kënd është takuar Holkeri (në ditën e vizitës
së Klintonit), por mund të them se Holkeri ka qenë
tepër i zënë dhe agjenda e tij ka qenë tepër
e ngarkuar“, ka thënë ndërkaq Karlovic.
Mediat: Klinton takon të gjithë
Duke ngarendur secila për të përcjellur sa më
mirë vizitën e presidentit Klinton dhe në mënyrë
sa më orgjinale, mediat kosovare kishin pasur secila qasjen
e tyre të veçantë, duke përdorur tituj, fotografi,
hyrje tekstesh e imazhe të ndryshme televizive prej njëra
tjetrës. Përpjekja për t’u dalluar kishte shkuar
aq larg sa mediat kishin dhënë raporte kontradiktore lidhur
me takimet e Klintonit me politikanët kosovarë. Natyrisht,
më shumë se përpjekja për t’u dalluar,
ishte interesi për të përfituar politikisht ai që
bëri mediat kosovare të takojnë pothuajse gjithë
spektrin politik kosovar me ish-presidentin amerikane dhe „presidentin
e përjetshëm të zemrave shqiptare“, Klinton.
Kështu, Klinton u takua me Rugovën, Thaçin, Haradinajn,
Nexhat Dacin, Bajram Rexhepin, Xhavit Halitin, përfaqësuesit
e serbëve dhe minoriteteve tjera. Dhe ballinat, varësisht
nga tendencat politike dhe ato profesionale të gazetave, u
zbardhën me fotografi të ndryshme.
Epoka e Re, duke sjellur një fotografi të përpunuar/retushuar,
ku shihen Klinton dhe Thaçi tek shtrëngojnë duart,
por ku nuk shihet prapavija, jep titullin “Clinton: Besoj
në vetëvendosje“. Sipas Veton Surroit, botuesit
të Kohës Ditore, Epoka e re nga prapavija e fotos ka hequr
Bajram Rexhepin, për t’i dhënë kështu
rëndësinë më të madhe përshëndetjes
Klinton –Thaçi. Sipas një burimi, nga fotoja është
hequr edhe Veton Surroi vetë, që ishte prezent aty afër.
Epoka e Re, pasi jep thekse nga fjalimi i Klintonit, në fund
të tekstit tregon për takimin e Rugovës me Klintonin,
duke përkujtuar se ata janë takuar edhe më herët,
në pranverën e vitit 1998, „pak ditë pas takimit
të 15 majit 98 me Milosheviqin, ku u bënë disa poza
problematike në lidhje me buzëqeshjet e tij të pakontrolluara“.
Sipas Epokës së Re, „me Klintonin ka këmbyer
mendime edhe kreu i Partisë Demokratike të Kosovës,
Hashim Thaçi“. Epoka e Re nuk thotë gjë për
takimin, ose përshëndetjet e Klintonit me kryeministrin,
kryetarin e Parlamentit ose të tjerët.
Po të njejtën ditë të vizitës së Klintonit,
Radio Televizioni Publik i Kosovës, RTK, ka dhënë
informacionin se ish-presidenti amerikan është takuar
me kryetarin Rugova për 40 minuta dhe sipas RTK-së, e
cila citon Kosovapress-in, ai është takuar edhe me kryetarin
e PDK-së, Thaçin.
Bota Sot duke dhënë titullin, „Bill Klinton: Gjatë
gjithë jetës do ta ndihmoj Kosovën“ ka dhënë
një fotografi të prerë të zbritjes së Klintonit
në aeroportin e Prishtinës, ku nuk merret vesh nëse
ai me duart e hapura i është drejtuar masës që
e përshëndet, apo Rugovës që ka dalur për
ta pritur. Në tekstin rreth vizitës Bota Sot përmend
që Klintoni ka takuar dy herë kryetarin Rugova, njëherë
në aeroport dhe njëherë në Fakultetin Filologjik,
dhe ka zhvilluar „blic biseda“ me liderë të
tjerë të Kosovës. Edhe Bota Sot përmend faktin
që Rugova kishte takuar Klintonin edhe më herët,
në pranverën e vitit 1998, por nuk është zgjatur
më tej. E vetmja Bota Sot ka pretenduar të japë fjalimin
e plotë të presidentit Klinton, por nuk ka arritur ta
bëjë këtë duke huqur disa paragrafe.
As Bota Sot, as Epoka si duket nuk janë përpjekur të
sigurojnë më shumë informacione lidhur me takimet
e Klintonit, dhe as që kanë cituar dikë, kur kanë
transmetuar se Klintoni është takuar me këtë
ose me atë
Koha Ditore, ndërkaq, ka dhënë fotografinë e
plotë të zbritjes së Klintonit në asfaltin e
aeroportit ku vërehet më mirë se ngazëllimi
i tij nuk i është drejtuar aq shumë Rugovës
sa masës së gazetarëve dhe atyre pak njerëzve
që kanë pasur mundësine të futen në pistat
e aterimit. Koha Ditore në titullin e saj i ka vënë
theksin asaj pjese të fjalimit të Klintonit ku ai flet
për marrëveshjen për ndërvarshmëri, duke
përdorur shembullin e Izraelit dhe Palestinës. Titulli:
“Për Kosovën, vetëvendosja vjen me kompromis,
thotë Clintoni“, ka qenë më neutral, duke vënë
theksin në dialogun dhe marrëveshjen që duhet pasur
mes palëve (sipas stilit izraelito-palestinez), për të
arritur zgjidhjen e problemit të Kosovës.
Zëri, nga ana tjetër, ka qenë e vetmja prej 4 gazetave
kryesore që nuk ka botuar në ballinë fotografi të
Klintonit me ndonjërin prej politikanëve kosovarë.
Për dallim, kjo gazetë në ballinë ka botuar
një fotografi të Klintonit të përqafuar prej
një djali të vogël dhe të rrethuar me masën
e ekzaltuar. Titulli: „Bill Klinton: Për Kosovën
do të bëj gjithçka që mundem deri në
fund të jetës sime“, i gjason pak a shumë titullit
të Botës Sot. Po ashtu, Zëri ka cituar zyrën
e Presidencës për të konfirmuar lajmin e takimit
„40 minutësh“ të Rugovës me Klintonit,
dhe është përpjekur të marrë vesh më
shumë nëse Klinton ka takuar Rexhepin dhe politikanët
tjerë.
|
