E shtunë 26.01.02

Aktualisht të gjithë e dimë se në Kosovë e kemi një protektorat ndërkombëtar, ku pushtetin efektiv de facto e kanë ndërkombëtarët, që zgjedhjet nacionale u zhvilluan me sukses dhe ishin të lira, të drejta dhe si rezultat i këtyre zgjedhjeve kemi përfaqësuesit qendror, ku tashmë e kemi të konstituar Parlamentin e Kosovës.Por, pas nje vakumi institucional,më në fund është emruar edhe kryeadministratori i ri Kosovës diplomati gjerman Mihael Shtajner (Michael Steiner). Në kohën kur kompetencat e ndërkombëtarëve duhet kaluar në duart e institucioneve qendrore, duke pritur pa durim, se liderët tanë politik sa më shpejtë do të merren vesh dhe të formohen institucionet demokratike aq të pritura .Këta përfaqësues sa do të jenë të suksesshëm në kryerjen e detyrave të tyre mvaret prej asaj se nga cili kënd i vështrojnë hallet dhe dertet, nga interesi i ngusht partiak apo më gjërë,do të shohim. Vallë si do të zbatohet parimi i bashkëqeverisjes?! Me çka justifikohet mbajtja peng e Parlamentit të Kosovës?!Kush e ka çelsin për zhbllokimin e e këtyre proceseve politike? Ata që nuk janë të kyqur askund "merakosen" për njërin ose tjetrin krah politik. Besa, nuk është lehtë!

Në këto rrethana nuk është me randësi forma, me rëndësi është të lind një koncept i ri faktori X; diçka që është me përmbajtje dhe në këtë bllokadë të proceseve politike t'i ndryshojmë botëkuptimet tona për vetëvehten, para se të na ndryshojnë ndërkombëtarët. Bartësit e faktorëve politik kanë nevojë për diçka që është dinamike, e mëvehtësishme,e jo t'i huazojnë kuturu klishetë e tejkaluara të disa këshilldhënësve nolstalgjik,të cilët tashmë janë të konsumuar profesionalisht dhe moralisht. Fakt është se tërë ai aparat ndërkombëtarë është arqitekt dhe projektues në një anë,ku para disa ditësh,në një konference për shtyp edhe vërejtjet e shefit të Misionit Gjerman,ambasadorit Mihajl Shmunk drejtuar liderëve tanë politik sinjalizojnë se kah po fryejne erërat.Por mos të harrohet, se në anën tjetër materiali pa të cilën nuk mund të bëjnë asgjë ndërkombëtarët,gjindet në substancën tonë kombëtare.

Poenta qëndron në atë se si të ç´bllokohet procesi i ndërtimit të institucioneve qeverisëse,si të implementohen ato projekte,ide, premtime që janë dhënë elektoratit nga ana faktorëve politik të zgjedhur.A duhet ta hargjojmë energjinë duke i përdorur frazat politike dhe idetë romantike?! Koha kalon në mënyrë maramendëse,çdo gjë është në lëvizje,në zhvillim e në transformim të përhershëm dhe të pandalshëm.Asgjë nuk qëndron statike, asgjë nuk është absolute,asgjë nuk është ideale dhe e përkryer, asgjë nuk ka të dhënë njëherë e përgjithmonë prandaj edhe shoqëria kosovare gërshetohet me të kaluarën,të tashmen dhe me të ardhmen.

Në këto rrethana të reja vërehen disa procese integruese dhe dezintegruese, ku gërshetohen njera me tjetrën, krijohet njëfarë interakcioni racional ose iracional në mes tyre. Bashkimi bën fuqinë- thotë fjala e urtë popullore.Por bashkimi bëhet nga shkaqe,interesa dhe rrethana të caktuara objektive dhe subjektive të indvidëve,faktorëve vendor politik dhe atyre të huaj ndërkombëtar.Ky integrim po nga rrethana e shkaqe të caktuara përmbrenda saj riprodhon dezintegrimin-ndarjen. Mirëpo, për fat të mirë ende egzistojnë njerëz që e kuptojnë kauzën e njëmendësisë së re që tashmë ka lindur,ku secili duhet të angazhohet në atë drejtim ku energjia të fokusohet në drejtim të filozofisë bashkëqeverisëse dhe natyrisht duke u respektuar parimet demokratike.

Mënyra se si bëhet prezentimi i qëndrimeve, opcioneve nga ana e faktorëve politik vendor dhe ndërkombëtar, tregon qartë një tendencë serioze të veprimit të tyre dhe në këto rrethana me qëllim apo pa të krijohet një konkurencë ndërmjet tyre.Strukturat politike vendore duhet të përfshihen në një proces të gjithanshëm njohjeje të zhvillimeve politike dhe të zotërimit të shprehive si:kompromisi,dialogu,toleranca,konsensusi,përshtatja me situata dhe rrethana të reja,etj...

Pozicioni i këshilltarëve politik duhet të karakterizohet nga një shkallë e lartë dialogimi dhe kompromisesh.Ndikimi i ngjarjeve të paparashikuara parashtron nevojën e domosdoshme që partitë politike të konsultohen me persona profesionistë të lamive të ndryshme.Shkalla e nuhatjes politike të faktorëve politik do të mvaret prej asaj se sa janë të kyqur ekspertët vendor në fazën fillestare të përgaditjes së materialeve që do të shqyrtohen nga Parlamenti i Kosovës.

Elektorati prej faktorëve politik pret energji pozitive e jo konfliktuese.Po që se nuk respektohen rregullat më minimale të lojës dhe të ndërveprimit politik,atëherë nuk duhet të çuditemi kur na tërheqin vërejtjen ndërkombëtarët me punën joefikase të liderëve tanë politik. Koha e pallavrave, muhabeteve ,thashethemeve ka kaluar.Mungesa e qeverisjes efektive ,indiferenca ndaj të drejtave dhe përgjegjësive të tyre qytetare,mospjesmarrja e kuadrove profesionale në mënyrë aktive në jetën politike,zgjidhja formale propagandistike dhe jo strukturore e çështjeve qëndrore do të jenë faktorë dhe gjeneratorë që do të rrezikonin realizimin e atyre qëllimeve madhore që i janë premtuar elektoratit.

Forcat kreative intelektuale si pikësynim e kanë të sensibilizojnë dhe të përkrahin ndërtimin e një shoqërie demokratike pluraliste, ku do të mbizotërojë ligji, liria e individit, inisiativa e lirë dhe respektimi i të drejatave të njeriut në përputhje me standardet ndërkombëtare. Zgjedhjet qendrore mbaruan me faqe të bardhë, ndërkombëtarët u fascinuan dhe na lavdëruan.Tani koha është t'i respektojmë dhe t'iu nënshtrohemi rregullave të lojës.Askush nuk ka të drejtë të monopolizojë skenën shoqërore-politike.Të gjithë jemi lojtarë,nuk ka askush të drejtë të luaj vetëm në fushë sporti. Referimi i mirëfilltë është i mundshëm vetëm nëse respektohen rregullat, ndërsa mediat elektronike le të masin pulsin e këtyre proceseve politike.

Atmosfera në këtë hapsirë shoqërore dhe politike të Kosovës, të shprehem hipotetikisht është si një konglomerat, ku retorika e ndërkombëtarëve dhe e përfaqësuesve të partive politike në disa segmente ka filluar të bëhet më e drejtëpërdrejtë. A do të paraqitemi më shumë si subjekte me synime teorike, politike, religjioze,estetike,filozofike, ekonomike apo sociale do të mvaret prej asaj se a do të pranojmë t'i filtrojmë kokat tona apo të sillemi në rreth..Sa xhiro i kemi bërë në sheshet tona nuk do të ketë rëndësi, me rëndësi është se reputacionin Kosovës do t'ja rrikthejnë vetëm njerëzit vullnetmirë të lidhur me parime konstruktive e jo me persona të caktuar.Jemi ngopur me fjalime.Tash është koha të mbahen fjalët.