Reagim i intelektulëve shqiptarë ndaj përpjekjeve për ta bërë Nënën Tereze "maqedonase"

Tiranë, Prishtinë, 14 korrik - Një grup intelektualësh shqiptarë nga të gjitha viset shqiptare u kanë drejtuar një letër të hapur zotit Alfred Moisiu, President i Republikës së Shqipërisë, Prof. Ylli Popa, kryetar i Akademisë së Shkencave të Shqipërisë, zonjës Arta Dade, ministre e Kulturës, Rinisë dhe Sporteve të Shqipërisë dhe zotit Edi Rama, kryetar i Bashkisë së Tiranës, me të cilën kërkojnë që në Tiranë të ngrihet një monument për Nënën Tereze. Poashtu ata reagojnë edhe kundër përpjekjeve të pahijshme që bëhen për t'i mohuar shqiptarsinë Nënës Tereze dhe mbi disa përpjekje për ta bërë Nënën Tereze "maqedonase".
Më poshtë po japim letrën e plotë të 38 intelektualëve shqiptarë dhe emrat e tyre.
Me bindjen se shprehim shqetësimin, ndjenjën dhe dëshirën e rretheve të gjera të bashkatdhetarëve, po Ju drejtohemi për sa vijon:
Viti 2003 është vit gjatë të cilit në shumë vende të botës zhvillohen ceremoni të shumta, fetare dhe laike, në përkujtim dhe nderim të bamirëses së madhe shqiptare, çmimit Nobel për Paqen, Nënës Terezë,
Kjo “Bijë e zgjedhur e popullit shqiptar”, siç e ka quajtur Papa Gjon Pali II, “kjo grua e vogël e madhe që mbart dhe ruan brenda saj humanizmin e popullit shqiptar” është bërë një simbol i admiruar dhe i respektuar në shkallë botërore nga njerëz të besimeve dhe kombësive më të ndryshme.
Ajo është një nga personalitetet më të mëdha të kombit tonë shqiptar dhe këtij kombi i përket e drejta dhe detyra ta nderojë denjësisht, jo vetëm si të mbarë botës, por edhe si tonën. I është vënë emri i saj sheshit të madh para Universitetit të Tiranës, aeroportit ndërkombëtar të Rinasit, kompleksit spitalor të Tiranës. Në Kosovë i është vënë emri i saj sheshit kryesor të Prishtinës dhe është vendosur aty shtatorja e saj. Por Sheshi “Nënë Tereza” në Tiranë pret ende të ngrihet aty shtatorja e saj, sipas vendimit që është marrë.
Ne nuk e dijmë se cilat janë arsyet e vonesës, por Ju drejtohemi Juve, me thirrjen që ngritja në Tiranë e monumentit të Nënës Terezë të shkëputet nga çdo qerthull burokratik, të realizohet ashtu si i përket dhe monumenti të përurohet në festën kombëtare të 28 Nëntorit 2003.
Një nga zgjidhjet e mundshme, me kuptim edhe simbolik, do të ishte ndoshta që, ashtu siç u çua në Prishtinë kopja e monumentit të Skënderbeut nga Kruja, të sillet në Tiranë kopja e monumentit të Nënës Terezë nga Prishtina.
Ndërkohë lexojmë në shtypin e ditëve të fundit mbi disa përpjekje për ta bërë Nënën Terezë “maqedonase”. Nënës Terezë mund t’i ngrihen monumente në çdo qytet të botës, ashtu edhe në Shkup, ku ajo ka lindur, por ajo në asnjë mënyrë nuk mund të quhet “maqedonase”, vetëm sepse ka lindur atje. Bijë familjeje brez pas brezi shqiptare nga Prizreni, me të jatin veprimtar të pavarësisë së Shqipërisë, të helmuar nga pushtuesit serbë, me nënën dhe motrën të varrosura në Tiranë, Nënë Tereza deklaronte në ceremoninë e marrjes së çmimit Nobel më 10 dhjetor 1979: “Atdheu im është Shqipëria”.
Shprehim mendimin se opinioni publik shqiptar duhej të ishte vënë më parë në dijeni, si për përpjekjet e pahijshme që bëhen për t’i mohuar shqiptarsinë Nënës Terezë, ashtu dhe për ndërhyrjet e drejta të organeve të shtetit shqiptar në Romë, Vatikan e Shkup. I mbështesim fuqimisht këto përpjekje dhe kërkojmë që ato të vazhdohen kudo ku duhet, me të gjithë forcën e duhur dhe me të gjithë argumentat e drejtë e të pakundërshtueshëm historikë, juridikë dhe etikë.

Tiranë, 11 korrik 2003.

Me respekt:
Në rend alfabetik: Afërdita Onuzi, Ali Aliu (Shkup), Ali Podrimja (Prishtinë), Arbër Xhaferri (Shkup), Basri Çapriqi (Ulqin), Bashkim Hoxha (Durrës), Bashkim Kuçuku, Edit Mihali, Fatos Arapi, Eleni Laperi, Eva Brinja, Gjergj Sinani, Hivzi Islami (Prishtinë), Jovan Basho, Kim Mehmeti (Shkup), Koçi Petriti, Kristaq Prifti, Lazër Stani, Leonard Zisi, Luan Mulliqi (Prishtinë), Luljeta Lleshanaku, Mehmet Myftiu, Mirush Kabashi, Moikom Zeqo, Natasha Lako, Nexhat Mustafa (Strugë), Pandeli Çina, Pano Taçi, Ramiz Kelmendi (Prishtinë), Rexhep Ismajli (Prishtinë), Romeo Gurakuqi (Shkodër), Sherif Delvina, Shqipe Zani, Tajar Kokalari (Gjirokastër), Tish Daija, Xhevahir Spahiu, Yllka Beçi, Zef Rakacolli.