Kërkesa më e fundit e ish-kampionit të Milanit, Roberto Donadoni, i ka prishur mendjen mesfushorit të talentuar...

Në ndjekje të talentit 18-vjeçar nga Kosova Valon Behrami vihen edhe Liverpul e Kievo

Interi në kërkim të kosovarit

Mesfushori preferon të luajë me skuadrën e Donadonit

Inter, Liverpul dhe Kievo në kërkim të talentit kosovar Valon Behrami. Lojtari i skuadrës së Luganos, është bërë ditët e fundit objekti kryesor i merkatos në Zvicër, duke u përfolur si një nga lojtarët më të kërkuar për momentin.

Dukej se fati i tij ishte orientuar drejt Premier Ligës, te Liverpul, por një gjë e tillë nuk është arritur ende, ndërkohë që edhe Interi ka këmbëngulur për të blerë kartonin e 18-vjeçarit nga Gjakova, që luan në krah të mesfushës. Ndërkohë që kërkesa më e fundit e ish-kampionit të Milanit, Roberto Donadoni, i ka prishur mendjen mesfushorit të talentuar. Një tjetër futbollist shqiptar do të luajë sezonin e ardhshëm në kampionatin italian. Bëhet fjalë për një talent të ri kosovar, i cili është thirrur nga trajneri i ekipit të serisë C1, Roberto Donadoni. 18-vjeçari Valon Behrami, nga Gjakova, por që jeton prej vitesh në Zvicër, ka zgjedhur ekpin e ish-kampionit të madh të Milanit dhe Kombëtares italiane për të luajtuar sezonin e ardhshëm, duke iu bashkuar Florian Myrtajt në këtë kategori të futbollit italian. Futbollisti kosovar Valon Behrami, 18 vjeç, nga shumë ekspertë të futbollit vlerësohet si njëri ndër lojtarët më të talentuar në Evropë për këtë moshë. Një gjë të tillë e vërtetojnë edhe ofertat e shumta të klubeve të mëdha, të cilat në këtë verë kanë dëshiruar ta angazhojnë në radhët e veta këtë mesfushor të ri kosovar. Futbollisti, që luan në kategorinë e parë zvicerane me Lugano, ende nuk ka firmosur zyrtarisht për ekipin xhenovez, por vetë ai ka shprehur dëshirën për t´u bashkuar me idhullin e tij, Roberto Donadoni. Agjenti i tij është kontaktuar nga drejtuesit e klubit të serisë inferiore italiane, por ende nuk është arritur që të nënshkruhet ndonjë gjë e sigurtë. Megjithatë, ai fillimisht ka refuzuar ofertën e Zherar Ullies, trajnerit të Liverpulit, e më pastaj një përgjigje negative ia ka dhënë edhe trajnerit të Interit, Hektor Kuper, si dhe drejtuesve të skuadrës së Kievos. Dhe, në vend se të luaj në Premiere Ligë të Anglisë, apo në Serie A të Italisë, Valoni ka vendosur të largohet nga Lugano dhe ta pranojë ofertën e skuadrës Xhenova, e cila luan në kategorinë e tretë italiane. Arsyeja, pse Valoni ka marrë një vendim të tillë të çuditshëm, është se kjo skuadër italiane drejtohet nga Roberto Donadoni, ish-ylli i Milanit dhe i Kombëtares italiane. “Donadoni është idhulli im. Luaj në të njëjtën pozicion që ka luajtur ai, në krahun e djathtë të mesfushës. Mendoj se nën udhëheqjen e tij do të përparojë shumë shpejtë. Në moshën time, kjo është më e rëndësishme sesa të luajë për ndonjë skuadër të madhe”, ka pohuar Valon Behrami për një të përditshme zvicerane. Duhet theksuar se krahas këtij futbollisti të talentuar, në skuadrën e Luganos, luan edhe një tjetër futbollist i ri kosovar, me nënshtetësi zvicerane. Është fjala për mesfushorin tjetër, Rrahim Shala. Në këtë skuadër ka luajtur edhe Rijat Shala, i cili muajin e kaluar kaloi në radhët e Grashopersit.

Gazeta “Frankfurt Rundchau” vlerëson shqiptarin
“Mehmet Dragusha njeriu që do çojë përpara Eintrahtin”

E ashtuquajtura “zemra” e Kombëtares shqiptare, treshja Çipi-Dragusha-Skela, do të jetë e padiskutueshme në formacionin fillestar të Eintrahtit të Frankfurtit. Mediat gjermane nuk kanë dyshime në lidhje me cilësinë e tre kuqezinjve. Madje, sipas tyre, Dragusha do të jetë njeriu që do ta shtyjë përpara skuadrën e Bundesligës. Dragusha do e shtyjë përpara drejt suksesit Eintrahtin. Me këtë titull, njëri nga gazetarët e njohur të së përditshmes prestigjioze “Frankfurter Rundshau”, ka analizuar atë që ka qenë periudha përgatitore e Eintrahtit të Frankfurtit. Padyshim, zbulimi i madh është kosovari Mehmet Dragusha, i cili përkundër asaj që pritej, jo vetëm që ka fituar një vend të padiskutueshëm në formacionin fillestar, por edhe është kthyer në një shpresë të madhe për skuadrën e Vili Rejmanit. Futbollisti i Kombëtares sonë ka qenë i papërmbajtshëm në krahun e majtë, duke shënuar madje edhe mjaft gola. “Krahu i majtë do të jetë me siguri i tij. Do të jetë ai që do ta shtyjë përpara Eintrahtin këtë sezon”, shkruhej në “Frankfurter Rundshau”. Ndërkohë po kjo gazetë theksonte se ashtuquajtura zemra e Kombëtares shqiptare, treshja Çipi-Dragusha-Skela, do të jetë titullare në këtë sezon.