"Që prej shekujsh rron e thëna, qengji i urtë i thith dy nëna,
por s'e dini më të renë, pi servili të gjithë kopenë!..." - (Popullore)

LDK-ja është në vlugun e zgjedhjeve partiake, përkatësisht në rivlerësimin e punës së saj dhe në kualifikimin e kandidatëve për funksione të reja brendapartiake që nga niveli më periferik deri në Kryesinë qendrore. Përvoja dymbëdhjetvjeçare e kësaj partie na jep mundësi të besojmë se këto zgjedhje do të kenë vlerën e saj në aspektin kualitativ, duke ua mundësuar kuadrove të afta që të japin kontributin e vet në avancimin e proceseve drejt aktit final për pavarësinë e Kosovës. Kjo ide do të sublimohet vetëm nëse arrihet një reformim cilësor e kualitativ, ku njerëzve të mendjes dhe të dijes do t'u besohen dhe do t'u mundësohet udhëheqja e reformave graduale e proceseve demokratike që kanë filluar.
Mbase beteja themelore për pavarësinë e Kosovës është mu tashti kur në Kosovë janë zgjedhur organet vendosëse dhe legjislative të vendit. Tani faktori kryesor në avancimin e aktit final janë shqiptarët: përgjegjësia bie mbi secilin njësoj, sepse atyre ua ka besuar populli këtë mision kaq fisnik, por si grupim politik përgjegjësinë më të madhe e bart pikërisht LDK-ja e cila ka fituar më shumë vende në parlamentin e Kosovës. Ajo tani duhet të bëjë reformën rrënjësore për vete, si shembull edhe për partitë e tjera të cilat heret a vonë duhet të reformohen, duke u liruar nga njeriu servil, i cili me apo pavetëdije i ka shërbyer të së keqes dhe rrëmujës së gjithëmbarshme. Prandaj, rrëmujat e krijuara me formulën e Dan Evertsit kanë pasur kuptimin e saj deri në çastin e nënshkrimit të dokumentit zyrtar për pajtueshmëri në emërtimin e organeve udhëheqëse të vendit.

Spekulimet nisin pikërisht tashti, me sabotime si kurs i një avazi të vjetër të qarqeve dhe grupimeve të caktuara, të cilat si duket janë të financuara nga qarqe të ndryshme, të cilat kanë arritur përmes organizatave të caktuara, klubeve ndërkombëtare, apo edhe asociacioneve edhe më të larta nëpër këto shtete e organizata që janë donatorët kryesorë të rrëmujës në Kosovë, të cilat janë propaganduar kryesisht përmes shtypit dhe informimit si leva kryesore e këtyre qarqeve. Bile, tashti pas lufte kanë marrë përmasa shqetësuese, ngase pozicionet janë po ato, dhe aktorët e njejtë si para, si gjatë dhe si pas luftës. Nuk ka nevojë të citohen emrat e atyre mjeteve të informacionit, por shihet se linja e atij intergralizmit jugosllav, që implikon struktura të caktuara të shoqërisë shqiptare kanë përseri privilegje të jashtëzakonshme për të bërë rrëmujë e kaos, dhe për të shpallur linçe të njohura që prej parardhësve të tyre. Si duket bosët e tyre, përsëri u kanë dhënë urdhëra...
LDK-ja bëri kompromiset e mjaftueshme dhe të domosdoshme për natyrën e pluralizmit të propaganduar. Po aq bëri lëshime edhe subjekti relevant që kandidoi një nga personalitetet e tyre që shpresohet se së paku do të krijoj bazamentin e një fryme tolerante dhe të bashkëpunimit ndërqeveritar dhe kjo u bë në momentin e duhur nga të dy palët dhe sikur u kuptua nevoja e domosdoshme për një qetësi relative në Kosovë. Për më shumë ky gjest politik mund të llogaritet si njëri nga vullnetet më të mira të veprimit dhe angazhimit për paqe e qetësi në rajon.
Strategjia e lëshimit pe, favorizon moralisht subjektin e caktuar, për këtë arsye triumfi politik i LDK-së në zgjidhjen e problemit nuk do t'i kthehet bumerang, siç aludohet, sepse vetëm kjo klimë tolerance brenda këtyre pak jave ia ka hapur dyert për një perspektivë të ndritur. Nuk ia vlen konfrontimi i mëtutjeshëm kur ka mundur të rrezikojë edhe organizimin e vet si subjekt politik. LDK-ja, me një përvojë të gjatë në lëshimin pe për ta ruajtur substancën dhe për ta arritur qëllimin final, bëri aktin më të mençur në këtë "kaosin" e kohës paszgjedhore. Kjo strategji politike duhet kultivuar edhe në të ardhmen, sepse elektorati do ta vërë jo rrallë para këtyre sprovave jo vetëm LDK-në, por edhe subjektet e tjera që participojnë në parlament. Lëshimi pe i LDK-së, nuk duhet cilësuar si "tradhti e dëshprim" për elektoratin e saj, përkundrazi veprimi i saj nxori në pahë veprimin e koalicionit serb "Kthimi", duke shpëtuar nga gremina njërin nga subjektet politike shqiptare, duke ua mbyllur gojën matrapazëve dhe telallëve të këtyre doktrinave se akcili personalitet a subjekt, u takua këtu apo aty dhe po bën marrëveshje me serbët. Se kush nxitonte të shpifte dhe cilat gazeta a media përhapnin dezinformata e gënjeshtra, duke iu dhënë zjarr, nuk ka nevojë të theksohen, sepse ato i di edhe lexuesi më i zakonshëm, që dita më më ditë po i kupton edhe veprimet e fshehta që janë në funksion të një politike që nuk i shërben Kosovës dhe ardhmërisë së saj.
Shikuar sipas zhvillimeve të mëvonshme dhe të një qetësie relativisht më të pranueshme nga gjithë popullsia e Kosovës, veprimi politik i kryetarit Rugova ka qenë kurdoherë i matur edhe me serbët si kundershtarët më të egër, të cilët kishin synim kryesor shfarosjen e substancës njerëzore shqiptare në këto hapësira. Së paku me kundërshtarët e politikës së LDK-së, nuk qëndrojnë në këto raporte sepse edhe nëse mendohet si kundershtar i veprimit klasik, ata nuk kanë programe klasike por kanë veprime të caktuara për eliminimin dhe bllokimin e trurit dhe mendjes së veprimit të mençur pranë LDK-së.
Prandaj, ashpërsia e veprimit publik dhe nervozizmi i tyre deri në çastin e miratimit të dokumentit për krijimin e institucioneve të Kosovës ka qenë akti më interesant i një opozite, që nuk mund të pajtohej me pozicionin që ia kishte caktuar vota e popullit dhe që nuk guxon tashti të interpretohet shtrembër për interesat e caktuara.
Nëse zhvillimet politike në Kosovë i shikojmë nga ky prizëm do të nxjerrim përfundime të vyeshme për të tashmen dhe të ardhmen e vendit. Tanimë subjektet politike në Kosovë, siç janë LDK-ja, AAK-ja dhe me sa di edhe PDK-ja, janë para kuvendeve të tyre zgjedhore dhe tani shtrohet pyetja a do të janë të zonja të bëjnë reforma cilësore, dhe sa do të jenë në gjendje për t'ua besuar vendet udhëheqëse mendjes dhe dijes. Në secilin subjekt politik shihet një përpjekje që çon nga pozitivja, por pengesa kryesore e këtyre proceseve janë mjetet e informacionit publik që fatkeqësisht janë në duart e të padijshmëve.
Me më shumë rrezik duhet parë servisin e asaj kategorie injorante, e cila është e paaftë, kurse disa prej këtyre mjeteve dallohen për zhargonin fyes e agresiv me një perfiditet të theksuar nga një kastë e implikuar në "diplomaci të fshehtë" dhe që bën të dyshojmë se janë të dirigjuar e që veprojnë me gjithë forcen për t'i penguar reformat brendapërbrenda subjekteve politike, e pastaj konfliktin për ta bartur drejtpërdrejt edhe në parlament.

Tani shtrohet pyetja se si është e mundshme që e njejta garniturë propaganduese të vijë përsëri në vendet kyçe të informacionit publik dhe si mund të shpjegohet fakti, kur gazetari i njejtë që prej 30 vjetësh ka vendin kyç në orientimin e opinionit publik për procese të caktuara dhe po ky soj gazetari ishte servis i komiteteve të LKJ-së, para pranverës '81, dhe që pastaj po ky tip gazetari në emër të LKJ ndoqi të gjitha zhvillimet politike që pasuan pas këtyre ngjarjeve.
Nëse gjërat shikohen nga prizmi i perspektivës do të venerohen lëvizje e gatishmëri politike për reforma edhe brenda bllokut opozitar, edhe aty ka mendje të ndritura dhe ka vullnet për të çuar proceset përpara, ka gatishmeri për të bërë kompromise, por ka pengesa pikërisht nga këto lidhje që i theksuam më parë. Si gjeneratë më e re që ishte, dhe pa përvojë intelektuale e politike, ata kanë futur vend e pa vend në funksion energjitë të cilat nuk iu kanë munguar.
Beteja për pavarsinë e Kosovës tanimë ka formën institucionale. Subjektet politike të cilat e përbëjnë Parlamentin e Kosovës, duhet shpalosur platformat e tyre për t'u arritur ky synim, me punë dhe programe, me përpjekje dhe angazhim serioz. Kjo do të arrihet vetëm duke i spostuar injorantët dhe servilët nga vendet kyçe brenda subjektit të caktuar. Po një shembull i mirë janë ngjarjet brenda dhe përreth Kosovës, dhe nëse përcillen me vëmendje dhe analizohen mirë përpjekjet e kualicioni serb "Kthimi" për ta bllokuar punën e Parlamentit të Kosovës.