Nuk është vetëm kënaqësi, por edhe privilegj të dëshirosh mirëseardhje në faqen e  Kuvendit të Komunës, shtëpisë së rreth 65.000 qytetarëve, përmes internetit, mjetit më bashkëkohor të njoftimit. 

Natyrisht, kjo mënyrë komunikimi mundëson të njoftohen, jo vetëm qytetarët e komunës  sonë, qofshin ata brenda apo jashtë Kosovës, por edhe të gjithë të interesuarit, kudo që ndodhen,  për atë se çfarë është duke bërë dhe çfarë synon Kuvendi dhe Qeveria e  komunës së Malishevës.

Çfarë është bërë që nga mbarimi i Luftës Çlirimtare në komunën e Malishevës

Komuna jonë nuk trashëgoi asgjë nga zhvillimi ekonomik, as nga infrastruktura në përgjithësi. Nga Lufta doli 95% e shkatërruar. Por, gjatë kësaj kohe, falë udhëhëqjes së mirë të Qeverisë së komunës, donatorëve të jashtëm e të brendshëm dhe punëve të vyera të qytetarëve, kemi arritur të bëjmë shumë, duke filluar nga rindërtimi, infrastruktura, por edhe zhvillimi ekonomik, në mënyrë që qytetarëve t’u përmirësohet mirëqenia.

Rindërtimi                                                                                       

Malisheva, edhe pse zona më e pazhvilluar e paraluftës dhe komuna më e dëmtuar gjatë Luftës Çlirimtare, me një angazhim sa reflektues, po kaq edhe përkushtues  të grupit drejtues, arriti t’i bindë donatorët humanitarë, të jashtëm e vendor, por edhe vetë qytetarët, për të ndihmuar dhe përmes kësaj ndihme përjetoi shkallën më të lartë rindërtuese në Kosovë, brenda mandatit të Qeverisë së Përkohshme, kur edhe ishte koha e intervenimit emergjent. 

Infrastruktura

Për këtë periudhë  (30 muajshe), është bërë plani urbanistik i qytezës me diametër 6.5 km; janë asfaltuar 11.000 m2 rrugë, brenda qytezës; janë shtruar mbi 6000m2 trotuare; është bërë ndriçimi i mbi 4.5 km rrugë; janë rritur sipërfaqet e gjelbëruara; është rregulluar  “Sheshi i dëshmorëve”, janë mbjellur fidane; është instaluar ujësjellësi; janë instaluar 4.5 km kanalizim primar; është bërë shtrirja e rrjetit të telefonisë fikse për qytezën dhe për fshatin Bajë, me gjatësi 4.6km; është bërë zgjidhja afatgjate dhe e mirë e dritave të qytezës; ëshrë hapur materniteti; është rregulluar tregu me sipërfaqe prej 2ha; është ndërtuar qendra zejtare; janë rregulluar Varrezat e Dëshmorëve; janë në përfundim e sipër dy blloqe banesash; kanë përfunduar ndërtimet e vrazhda për shkollën  e re  fillore në Malishevë. 

Në këtë drejtim është punuar edhe në fshatrat e komunës, si: është bërë asfaltimi i rrugës Bajë-Tumelinë (Temeçinë), në gjatësi prej 5 km.; ka filluar asfaltimi i rrugës Pagarushë-Gurishtë-Marali-Dragobil, në gjatësi prej 5 km.; ka filluar asfaltimi  i rrugës Lumishtë-Turjakë-Grap-Rud-Labi-Mrasor, në gjatësi prej 16 km.; është bërë meremetimi, aftësimi dhe mirëmbajtja e të gjitha rrugëve, të cilat lidhin fshatrat ndërmjet   tyre dhe lidhjet  me rrugët e asfaltuara; është bërë aftësimi i ujësjellësit në Pleqnar (Kijevë), Arbnesh (Astrazup), Bujan (Llozicë), Ngucat, Tërpezë, si dhe ndërtimi i ujësjellësave të rinj në: Bajë, Karvasari, Dragobil, Maxharrë, Shkozë, Grap (Panorc) e Rud; janë mbështetur të gjitha nismat vullnetare të qytetarëve për rregullimin e kanalizimeve dhe stacioneve të rrymës elektrike, si në: Turjakë, Dragobil, Maxharrë, Shkozë, Arnbesh, Rrezor, Qarrlug, Marali, Ballanik (Bellanicë), Burim, Lladroc etj.

Infrastruktura shkollore

Gjatë vitit 2004, janë ndërtuar tri  shkolla të reja dhe dy janë në fazën e fundit ndërtuese. Në Mirushë, Drenoc e Ngucat është bërë përurimi i shkollave të reja, ndërsa në  Malishevë e Bardh shkollat janë në në ndërtim e sipër. Nërsa punët për përfundimin e ndërtimit të shkollës në Bardh janë duke shkuar mirë, në shkollën fillore të Malishevës është ndërprerë puna, për shkak të mungesës së mjeteve. Për të përfunduar ndërtimi i kësaj shkolle, nevojitet një shumë e konsiderueshme mjetesh, pasi hapësira e shkollës, që në projektin e planit, është parapa t’i përmbushë  të gjitha kërkesat për numrin e nxënësve të qytezës. Përveç kësaj, është ndërhyrë në përmirësimin e infrastrukurës në shkollat fillore në fshatrat:  Arbnesh, Shkozë, Lumishtë, Guramir, Pleqnar, Kodranesh, Drenar, Bujan, Qarrlug (në të dyja shkollat), Tërpezë, Dragobil,  Lladroc, Bajë etj.

Infrastuktura e shëndetësisë

Në raport me mundësitë e pakta buxhetore, edhe në infrastrukturën shëndetësore kujtojmë se është bërë mjaftë. Për herë të parë, edhe përkundër nevojës së kahershme,   është hapur maternitetei i parë në  komunën tonë. Vlenë të theksohet se materniteti i plotëson  standardet bashkëkohore. Janë ndërtuar dhe  meremetuar mbi 500 m2 hapësirë për shërbime shëndetësore, në zonat e thella të komunës; janë blerë pajisje shëndetësore dhe barëra për shtresat sociale dhe janë mbështetur vazhdimisht personat me aftësi të kufizuara.

Zhvillimi ekonomik

Për të patur një ekonomi me një zhvillim të shëndetshëm për shoqërinë, së pari duhet të jenë ligjet në favor të saj, por, pavarësisht nga pozita jo e mirë e Kosovës në këtë drejtim, Kuvendi i Komës është përpjekur t’i shfrytëzojë të gjitha mundësitë, për të ndërtuar një bazë të shëndoshë për zhvillimin ekonomik, duke nxjerrë rregullore dhe vendime,  për t’i dhënë mundësi Qeverisë  së komunës që të joshë kompanitë private, të cilat janë të interesuara për të investuar, si p.sh.: “Timi-Kosova”, “Drini”, “Dardania”, “Global” etj.,  investimet e të cilave, për vitin 2004, kanë arritur në afro 20 milionë euro.

Kjo formë investimi, rrjedhimisht, ndikon edhe në zbutjen e papunësisë,  brengës më të madhe të komunës sonë.

Çarë synohet

Për të krijuar kushte sa më të mira jetësore për qytetarin tonë të merituar, por edhe të shumëvuajtur, tërë potenciali ynë njerëzor, profesional dhe institucional do të angazhohet në mënyrën më të sinqertë dhe më të përkushtuar, duke u dhënë përparësi resurseve dhe shfrytëzimit të specifikave, të cilat i ka komuna jonë, përmes formave që zbaton bota e zhvilluar, pra përmes formave të koncesionit.

Në fund, duke përshëndetur të gjithë ata, të cilët shfletojnë faqen tonë në internet, ftoj të  të interesuarit, të vijnë në komunën e Malishevës, në komunën dhe vendin  më të mirë, i cili jo vetëm dëshiron, por edhe di, do dhe mund të bëhet edhe më i mirë. Por, komunën e Malishevës mund ta bëjmë edhe më të mirë dhe më të dashur vetëm me bashkëpunim.