Këngëtari Mustafa Imeri-Tafa, një talent i cili premton shumë, po pushton zemrat e të rinjve shqiptarë, që ka mirëpritur repertoarin e tij.

Mustafa Imeri – Tafa ka filluar që të merret me muzikë që në moshë fëmijërore. Talentin e tij e kishte zbuluar xhaxhai i tij, këngëtari i njohur Adem Imeri, i cili i kishte dhënë shtytje të merrej me muzikë.

Mustafa Imeri ka kryer shkollën e mesme të muzikës dhe akademinë e muzikës për solo këndim në Shkup. Ai është shqiptari i dytë, pas Bashkim Paçukut, që e ka kryer për solo-këngëtar.

Imeri e konsideron muzikën si profesionin e tij të vetëm, të cilit i është përkushtuar tërësisht. Por ai është angazhuar edhe përsa i përket muzikës të ashtuquajtur zbavitëse. Adhuruesit e njohin nga pjesëmarrjet nëpër festivale për fëmijë dhe të rritur: “Bilbilat këndojnë”, festivalin mbarëkombëtarë të Shkodrës, “Tins Fest”, pastaj në “Nota Fest”, në festivalin “Shou Fest” në Kosovë dhe nga festivali i fundit “Maratona e këngës popullore”, në Tiranë.

Përsa u përket albumeve Mustafa nuk ka realizuar asnjë album, por shpreson se së shpejti do të ndodh edhe kjo.

“Jam duke përpunuar këngët që do të prezantoj në album. Shpresoj se pas vitit të ri adhuruesit e ëngës sime do të kenë mundësi që të kenë albumin tim”, thotë Mustafa Imeri.

Vitin e kaluar ai ka realizuar video-klipin e parë të këngës “Shqetësimi”, ndërsa tani është duke realizuar videoklipin e këngës “Bien tri dahire”, me të cilën u prezantua në “Maratonën e këngës” në Tiranë, dhe e cila është realizuar në studion “Abrakadabra” dhe nga video produksioni “Tomato”. Klipi është xhiruar në galerinë e Hamamit “Daut Pasha”, sponzorizuar nga kompania “Energy Drink Bullit”, Shoqëria e sigurimit “Sigma” , kompania “Gemak-Johnnie Walker” dhe “Euro linja”.

Për imixhin e tij është përkujdesur “Keka”, butiku “Dizel”.

Promovimi i video-klipit pritet të bëhet në Naight Clubin “VEGA” të Arben Shaqirit-Beni.