Këngëtarja karizmatike Leonora Poloska po ngjitet me sukses në majat e estradës së këtushme. Brenda një periudhe relativisht të shkurt ,ajo ka fituar disa çmime të rëndësishme, duke vërtetuar në këtë mënyrë talentin dhe potencën prej këngëtareje. Më 1995, në festivalin “ Nota Fest”, Leonora ka fituar çmimin për interpretim më të mirë. Pas këtij preludi, në po të njëjtin festival, në vitin 1996, kariera e saj është kurorëzuar me çmimin e parë të jurisë së këtij festivali. Festivali “ Nota Fest” edhe dy herë tjera ka hapur dyert e suksesit për këngëtaren Leonora Poloska. Më 1999 ajo fiton vendin çmimin e parë nga publiku në këtë festival.
Festivali “ Shoë Fest” është tjetër bastion i talentit dhe i sukseseve të Leonorës. Tre vjet radhazi ajo do të shpërblehet në këtë festival. Në vitin 2000 fiton çmimin e dytë, në vitin 2001 çmimin e parë, ndërsa në vitin 2002 përsëri fiton çmimin e dytë.
Sfondi i suksesshëm i Leonora Poloskës aktualisht është pasuruar edhe me një këngë tjetër që përputhet me vokacionin e kësaj kengëtareje.” Të dua s’të dua” është kënga më e re e saj, e cila qarkullon ngjeshur në shumë radi-stacione.
Leonora ndjehet e ngazëllyer që kjo këngë ka bërë jehonë te adhuruesit e saj. “ Më vjen mirë që kjo këngë pëlqehet, sidomos kur kam parasyshë që frymëzimi për këtë këngë më ka lindur duke dëgjuar muzikë nga jeta e përditshme”, thotë ajo. Momentalisht, thotë ajo, jam duke përgatitur video-klipin e kësaj kënge, të cilin do ta xhiroj në shtëpinë e produksionit “ Tomato”.Leonora thotë se, muzikën e kësaj këngë e ka bërë Robert Bilbilos, ndërsa teksti i këngës është i saj. Ajo, sqaron se stili i kësj kënge është modern, pop-muzikë e përzier me ritëm oriental. Leonora nuk zbulon vendet se ku do të xhirohet ky video-klip, për shkak se dëshiron që kjo gjë të mbetet befasi për adhuruesit e saj.
Ajo, gjithashtu thotë se, është duke punuar në këngët e albumit më të ri, që do të jetë album i dytë për të.Sipas Leonorës, videoklipi i këngës “ Të dua s’të dua” pritet të realizohet kah fundi i muajit shtator. Menjëherë pas realizimit të video-klipit, Leonora shpreson të bëj promovimin e tij, me çrast parasheh të ftoj shumë mysafirë dhe këngëtarë të tjerë.” Ky është video-klipi im i parë dhe është zvarritur shumë shkaku i mjeteve materiale . Kam dashur të realizoj një video-klip të mirë, dhe kjo është arsyeja e kësja zvarritjeje”, thotë ajo. Leonora ndjehet e sigurt në talentin e saj. Edhe pse nuk kam pasur video-klipe të këngëve të albumit të parë, thotë ajo, ato megjithatë arritën të bëhen hit, sidomos kënga “Nuk më kupton”.
Ambiciet e kësaj këngëtareje që ngjitet me hapa të sigurt në majat e estradës siç duket nuk përfundojnë këtu. Leonora paralajmëron se, pas realizimit të albumit të dytë do të organizojë disa koncerte në Kosovë, Maqedoni si dhe në diasporë.