Pas dy vjetësh ajo rikthehet sërish në teatrin antik të Butrintit ku dha një koncert madhështor me datën 5 korrik të titulluar “Inva live në Butrint". Sopranoja e njohur shqiptare Inva Mula ka ideuar një tjetër koncert të saj në këtë vend. "Kam dëshirë ta vazhdoj këtë koncert veror që nisi si një aventurë e vogël dhe u kthye në domosdoshmëri të planeve të mia artistike" ka thënë ajo.

Sopranoja e njohur këndoi live gjatë gjithë koncertit. Ariet e përzgjedhura për këtë koncert qenë 'ajka' e veprave që pëlqehen nga publiku dhe që i përshtaten një skene në qiell të hapur. Koncerti u çel me një uverturë festive të kompozuar nga Nikolla Zoraqi.
Një nga të veçantat e koncertit ishte dhe arieja e Avni Mulës “Agimet shqiptare”. Këtë herë Mulën e shoqëroi një kor prej 24 vetash i përbërë nga artistë të Akademisë së Arteve të Bukura dhe liceut artistik “Jordan Misja”. Mula ka sjellë në greqisht “luleborën” e Shkodrës në koncertin e saj. Kënga është interpretuar nga Inva Mula dhe tenori i famshëm grek Mario Frangulis me kompozim të Simon Gjonit. Ai ndërkohë u ftua në këtë koncert të interpretojë krijimtarinë muzikore të Mitis Teodorakis, një emër i njohur i muzikës klasike greke.

Megjithëse soprano shqiptare thotë se ka qenë vetëm një eksperiencë e mëparshme, që ka patur me këtë këngëtar, edhe pse jehona e të cilit nuk ka mbërritur ende në Shqipëri, ai ka mundur të ketë emër internacional. Dhe kjo është një nga arsyet që ajo vendosi të bashkpunojë me këtë këngëtar.

Në këtë koncert të dytë të saj në Butrint, Mula u shoqërua nga Orkestra Filarmonike e Teatrit të Operas dhe Baletit dhe dirigjenti francez Zherom Pilmo. Dirigjenti i njohur thotë se "Kënaqësia dhe emocioni i artistit është të shkojë një një teatër të njohur dhe Butrinti është një nga më të bukurit e botës, dëshirë të cilën arrita ta realizoja nëpërmjet këtij koncerti të madh të sopranos shqiptare".

Në 27 Qershor Inva Mula dha një koncert të madh në Zyrih (Zvicër), ndërsa një ditë më vonë ajo u nis drejt Tiranës, duke refuzuar gjithë ofertat e tjera. "Për koncertin që u zhvillua në Butrint kam lënë dhe mjaft vende të tjera si Italinë dhe Francën", - shprehet Mula duke shpjeguar të gjitha shkaqet e anullimeve të këtyre ofertave. "Gjithçka e bëra vetëm se publikut të jugut të Shqipërisë dhe atij të kryeqytetit i duhej një koncert veror”. Sopranoja e njohur mendon që të kthehet live vit pas viti në Butrint duke krijuar një traditë të re në teatrin e ndërtuar 3400 vjet para Krishtit duke e “pushtuar” atë me kryeveprat operistike botërore dhe shqiptare.