Puna nis më 7 korrik, luajnë dhe aktorë shqiptarë

Një film, ngjarjet e të cilit zhvillohen në Liban, do të nisë xhirimet në Shqipëri më 7 korrik. Si një prodhim franko-kanadez, është zgjedhur pikërisht Shqipëria për të realizuar xhirimet, pasi situata në Liban nuk është e favorshme për këtë gjë.

Në film do të luajnë edhe aktorë shqiptarë.

“Littoral” është titulli i këtij filmi, skenari i të cilit është shkruar nga vetë regjisori Wajdi Mouawad, dramaturg dhe regjisor teatri i njohur në Kanada. Jeta e një djaloshi libanez, që jeton në Kanada, ndryshon në pak momente. Ai merr vesh lajmin e vdekjes së të atit dhe i duhet të kthehet në Liban pas shumë vitesh emigrim në Kanada. Një jetë kthimi e mbushur me peripeci dhe aventura, në kërkim të banesës së fundit të babait të tij, është thelbi i këtij filmi social psikologjik, i cili ka përfunduar tashmë xhirimet e para në Kanada, saktësisht dy javë xhirime. Pjesa tjetër e xhirimeve do të vijojë në Shqipëri. Sot mbërrin pjesa më e madhe e grupit të xhirimeve, ku përfshihet regjisori, producentja, kostumierja, skenografi, menaxherët etj. Producenti ekzekutiv i këtij filmi, Arben Tasellari, rrëfen se regjisori i filmit Wajdi Mouawad ishte në Shqipëri para tre javësh, kur është bërë edhe një tur njëjavor në të gjithë vendet e xhirimeve me qëllim përcaktimin e tyre.

Pse u zgjodh Shqipëria?
“Ngjarjet e këtij filmi, në të vërtetë zhvillohen në Liban dhe ai nuk ka ndonjë lidhje me Shqipërinë. Por meqë klima në Liban është e vështirë dhe është gati e pamundur për të xhiruar atje për shkak të situatës dhe sigurisë, producentët kanadezë, menduan se klima, atmosfera, fshatrat, dhe një pjesë e mirë e natyrës shqiptare është shumë e ngjashme me Libanin”. Kështu thotë producenti Tasellari, i cili saktëson se në Shqipëri do të bëhet prodhimi ekzekutiv i filmit. Por, ndërsa aktorët kryesorë të këtij filmi janë përcaktuar tashmë dhe janë kryesisht kanadezë, është vendosur për një sërë aktorësh shqiptarë, të cilët do të luajnë në role episodike dhe figurantët në këtë film. Tasellari pohon se, megjithëse ende nuk është vendosur përfundimisht për aktorët shqiptarë, një pjesë e tyre janë përcaktuar tashmë dhe po vendoset përfundimisht për karakteret që do të mishërojnë në këtë film.

Shtete ku filmat kushtojnë lirë
Sipas producentit Tasellari, xhirimi i këtij filmi këtu është një rast i mirë për kinemanë tonë. Kjo jo vetëm për promovimin e vendeve shqiptare, por edhe për përfitimet ekonomike që vijnë në Shqipëri. “Është një nga rastet e rralla që, kinemaja shqiptare, të japë një shërbim të tillë. Sepse janë shumë të rrallë filmat e huaj që janë xhiruar këtu”, thotë producenti. Por, sipas tij, janë të shumtë filmat hollivudian që xhirohen në Evropë, pavarësisht se ku vendosen ngjarjet e tyre. “Një pjesë e mirë e tyre kanë arritur të spostohen në Evropë, përkatësisht në Rumani, Bullgari, Çeki etj”, thotë Tasellari, duke shtuar se kjo rrugë ndiqet pasi kostoja e xhirimeve është më e ulët dhe prodhimi i filmave është më i lehtë.

Kuriozitete mbi filmin

Xhirimet në Shqipëri do të zhvillohen në pjesën jugore të bregdetit shqiptar në Dhërmi, Porto Palermo, Himarë etj. Ka pak xhirime në Vlorë dhe në Tiranë, jo nëpër rrugët e kryeqytetit, por në ambiente të përzgjedhura të tij
Aktorët shqiptarë, të cilët do të luajnë në film, janë Niko Kanxheri, Fadil Kujovska, Natasha Sela, Ervin Bejleri etj
Regjisori 34-vjeçar, Wajdi Mouawad, është regjisor teatri dhe dramaturg. Ai është gjithashtu edhe skenarist i filmit
Skenari është bazuar në një dramë të shkruar po nga Mouawad
I lindur në Liban në vitin 1968, Mouawad jeton prej vitesh në Kanada. Ky është filmi i parë që ai realizon
Filmi nuk ka nota biografike, megjithëse jeta e personazhit i ngjan shumë jetës së regjisorit me origjinë libaneze
Skenari i filmit përfshin jetën e një të riu libanez që jeton në Kanada. Atë e marrin në telefon nga vendi i lindjes, nga Libani, nga i cili ishte larguar para shumë vitesh. Me këtë vend kishte humbur të gjithë lidhjet. Pasi e njoftojnë se i ka vdekur babai, ai duhet të kthehet për të identifikuar kufomën
Xhirimet e filmit (përveç xhirimeve në Kanada) do të realizohen të gjitha në Shqipëri